ცენტრის საქმიანობის მიზნებია:
– ქართული კონსტიტუციონალიზმის უახლესი წარსულის კვლევა;
– კონსტიტუციონალიზმის ინტერდისციპლინური შესწავლა.
საქმიანობის მიზნებიდან გამომდინარე ცენტრი:
– გამოსცემს საკუთარ პუბლიკაციებს, თარგმნის კონსტიტუციონალიზმის სფეროში ევროპულ და ამერიკულ პოპულარულ გამოცემებს;
– ატარებს სემინარებს, კონფერენციებს, ტრეინინგებსა და იმიტირებულ სასამართლო პროცესებს.
გიორგი მელაძე – სამართლის სკოლის კონსტიტუციური კვლევების ცენტრის დირექტორი 2013 წლიდან, ილიას სახელმწიფო უნივერსიტეტის სამართლის სკოლის ასოცირებული პროფესორი 2014 წლიდან.
მისი კვლევის სფეროებია: სახელმწიფოსა და ეკლესიის ურთიერთობა, შედარებითი კონსტიტუციური სამართალი და ადამიანის სამოქალაქო უფლებები, მედიის რეგულირებასთან დაკავშირებული კანონმდებლობა
გიორგი მელაძეს ადგილობრივსა და საერთაშორისო ორგანიზაციებთან ურთიერთობის ფართო გამოცდილება გააჩნია. საქართველოში აქტიურად მონაწილეობდა პარლამენტთან და მთავრობასთან არსებულ სამართლებრივი რეფორმის ჯგუფებში საკონსტიტუციო, სისხლის სამართლის, ადამიანის ძირითადი უფლებების და ანტიკორუფციული მიმართულებით. 2002-2003 წლებში კვლევითი პროგრამის ფარგლებში იმყოფებოდა კოლუმბიის უნივერსიტეტში, 2004 წელს კვლევითი პროექტის ფარგლებში მუშაობდა გამოხატვის თავისუფლების დაცვის საერთაშორისო ორგანიზაციაში Article 19, 2008-2012 წლებში, აქტიური წევრის უფლებამოსილებით, მონაწილეობდა ევროპის საბჭოს ეროვნულ უმცირესობათა ჩარჩოკონვენციის ფარგლებში შექმნილ მრჩეველთა საბჭოში და მოამზადა მოხსენებები სლოვაკეთის, პოლონეთისა და ჰოლანდიის შესახებ. 2004 წლიდან ასწავლის საქართველოს სხვადასხვა სახელმწიფო და კერძო უმაღლესი საგანმანათლებლო დაწესებულებების სამართლის ფაკულტეტზე. მისი რედაქციით გამოცემული წიგნი „რელიგიის თავისუფლება“ სხვადასხვა უნივერსიტეტი სამართლის ფაკულტეტზე გამოიყენება ძირითად სახელმძღვანელოდ. ილიას სახელმწიფო უნივერსიტეტის სამართლის სკოლის კონსტიტუციური კვლევების დირექტორია 2013 წლიდან. ილიას სახელმწიფო უნივერსიტეტის სამართლის სკოლის ასოცირებული პროფესორია 2014 წლიდან.
გიორგი მუმლაძე – ილიას სახელმწიფო უნივერსიტეტის კონსტიტუციური კვლევების ცენტრის მკვლევარი, სამართლის სკოლის ლექტორი.
მისი კვლევის სფეროა საჯარო სამართალი, კერძოდ: მუნიციპალური სამართალი, არჩევნები, სახელმწიფო მოწყობა და მმართველობა.
გიორგი მუმლაძე ჩართულია საარქივო კვლევაში საქართველოს პირველი რესპუბლიკის (1918-1921 წწ.) შესახებ, ასევე ილიას სახელმწიფო უნივერსიტეტში მიმდინარე იმიტირებულ სასამართლო პროცესებში.
ალიკა კუპრავა – ილიას სახელმწიფო უნივერსიტეტის კონსტიტუციური კვლევების ცენტრის მკვლევარი, სამართლის სკოლის ლექტორი.
მისი კვლევის სფეროა საჯარო სამართალი, კერძოდ: სახელმწიფოს ტერიტორიული მოწყობა და მმართველობის ფორმები.
ალიკა კუპრავა იკვლევს უზენაესი და საკონსტიტუციო სასამართლოს პრაქტიკას გამოხატვის თავისუფლების საქმეებზე, ჩართულია ილიას სახელმწიფო უნივერსიტეტში მიმდინარე იმიტირებულ სასამართლო პროცესებში.
გიორგი ნონიაშვილი – ილიას სახელმწიფო უნივერსიტეტის კონსტიტუციური კვლევების ცენტრის მკვლევარი, სამართლის სკოლის ლექტორი.
მისი კვლევის სფეროებია: საჯარო სამართალი, უმცირესობების უფლებები, რელიგიური გაერთიანებების უფლებრივი მდგომარეობა, სახელმწიფოს უსაფრთხოების პოლიტიკა.
ნინო ჭელიძე – ილიას სახელმწიფო უნივერსიტეტის კონსტიტუციური კვლევების ცენტრის კოორდინატორი.
ნინო კოორდინაციას უწევს ცენტრის აქტივობებს, მონაწილეობს მათ დაგეგმვასა და შემდგომ მონიტორინგში.
ძვირფასო მეგობრებო,
ტრადიციულად, წარმოგიდგენთ კონსტიტუციური კვლევების ცენტრის ყოველწლიურ ანგარიშს.
ჩვენთვის განსაკუთრებულად მნიშვნელოვანი იყო 2017 წელი, რადგან საქართველოს პარლამენტმა დაასრულა კონსტიტუციის ახალ ტექსტზე მუშაობა და ფუნდამენტურად შეცვალა სახელმწიფოს ძირითადი კანონის მნიშვნელოვანი ნაწილები. ცენტრი ყურადღებით ადევნებდა თვალს რეფორმის პროცესს და არაერთხელ დააფიქსირა საჯაროდ საკუთარი პოზიცია სხვადასხვა პრობლემურ საკითხზე, როგორც ინდივიდუალურად, ისე სხვა ორგანიზაციებთან ერთად.
ჩვენ წელსაც გავაგრძელეთ ნაფიც მსაჯულთა სასამართლოს მიმართულებით მუშაობა, მოვიპოვეთ მცირე გრანტი ნაფიც მსაჯულთა ინსტიტუტის შესახებ, რომელიც დაგვეხმარა, საგანამანათლებლო კამპანია ჩაგვეტარებინა მთელ საქართველოში. აქვე, განსაკუთრებით გვინდა აღვნიშნოთ იმ სტუდენტების წვლილი, რომელთა გარეშეც შეუძლებელი იქნებოდა პროექტის (“ნაფიც მსაჯულთა საინფორმაციო ქსელი”) განხორციელება. სამართლის სკოლის სტუდენტების ენთუზიაზმისა და უდიდესი ენერგიის შედეგია, რომ წარმატებით ჩავატარეთ პროექტით გათვალისწინებული აქტივობები და შევქმენით ნაფიც მსაჯულთა სასამართლოს გულშემატკივართა ჯგუფები ბათუმში, ზუგდიდში, ქუთაისში, გორში, რუსთავში, თელავსა და თბილისში.
წელს ჩვენს საქმიანობას შეემატა მთარგმნელობითი მიმართულება და ცენტრმა პირველად მოიპოვა მთარგმნელობითი გრანტი, რომლის ფარგლებშიც მომავალ წელს დასრულდება და გამოიცემა ცნობილი ამერიკელი ავტორების – ნილ ვიდმარისა და ვალერი ჰანსის წიგნი: “ამერიკელი მსაჯულები – ვერდიქტი”. ვულოცავთ ამ წარმატებას კონსტიტუციური კვლევების ცენტრსა და სამართლის სკოლის სტუდენტებს. მალე ჩვენს ბიბლიოთეკას კიდევ ერთი მდიდარი გამოცემა შეემატება.
ასევე, 2017 წლის მიწურულს, 2017 წლის ფუნდამენტური კვლევებისთვის სახელმწიფო სამეცნიერო გრანტების კონკურსზე, მოვიპოვეთ შოთა რუსთაველის ეროვნული სამეცნიერო ფონდის კვლევითი გრანტი ნაფიც მსაჯულთა სასამართლოს რეფორმის კვლევისა და საინფორმაციო მხარდაჭერის მიზნით. პროექტი – „ნაფიც მსაჯულთა სასამართლო რეფორმა საქართველოში – პირველი ნაბიჯები და პირველი გამოწვევები“ ითვალისწინებს ნაფიც მსაჯულთა სისტემის რეფორმის მიმდინარეობის სიღრმისეულ კვლევას, აღნიშნული თემატიკის აკადემიური დისკურსის ინიცირებასა და ზოგადად, ინსტიტუტის შესახებ საზოგადოების უფრო მეტად ინფორმირებას, აღნიშნული ინსტიტუტის მეშვეობით მართლმსაჯულების სისტემის მიმართ ნდობის ამაღლებას.
დაწვრილებით ანგარიშში აღვწერთ ჩვენი აქტივობების შესახებ, აქ კი გვინდა მადლობა გადავუხადოთ სამართლის სკოლის თანამშრომლებსა და დეკანს, რომელთა დახმარების გარეშეც შეუძლებელი იქნებოდა ჩვენი პროგრამების ეფექტურად განხორციელება და აუცილებლად უნდა აღვნიშნოთ სამართლის სკოლის სტუდენტების შრომა, რაც უდიდეს ენერგიას გვაძლევს და ახალი პროგრამების შექმნაშიც გვეხმარება.
იხილეთ: კონსტიტუციური კვლევების ცენტრის წლიური ანგარიში – 2017
პატივისცემით, გიორგი მელაძე
ილიას სახელმწიფო უნივერსიტეტის სამართლის სკოლის ასოცირებული პროფესორი
სამართლის სკოლის კონსტიტუციური კვლევების ცენტრის დირექტორი
